September 2004

Eins og flestir vita þreyja nemendur 4., 7. og 10. bekkja samræmd próf á hverju ári. Í 4. og 7. bekk er það í íslensku og stærðfræði en í 10. bekk eru prófin mun fleiri. Í vetur ætlar Skólavefurinn að bjóða upp á þjálfunarprógramm fyrir prófin, sem byrjar strax í dag. Við förum rólega af stað en aukum efnið jafnt og þétt eftir því sem nær dregur prófunum. Efnið mun samanstanda af gagnvirkum samræmdum prófum og þjálfunarefni í því sem reynst hefur nemendum erfitt og líklegt er að komi að góðum notum. Við hvetjum alla til að taka þátt í prógramminu frá byrjun. því ekki er ráð nema í tíma sé tekið.

Við byrjum á efni fyrir 10. bekk

1) Stærðfræði fyrir 10. bekk.
Við byrjum á að skoða nokkur dæmi um flatarmál og ummál hrings, en búast má fastlega við að svoleiðis dæmi komi á prófinu í vor. Við vekjum athygli á vídeóútskýringum með dæmunum sem sýna hvernig þau eru leyst. Smellið einfaldlega á tengilinn fyrir neðan spurningarnar til að sjá útskýringarnar.

2) Danska fyrir 10. bekk.
Fyrsti kafli í skemmtilegri sögu eftir Vilhjálm Gíslason “Rejsen með guderne”. Sagan reynir á mörg atriði sem verður prófað úr, t.d. lesskilningi, skilningi á mæltu máli og málfræði.

Nemendur eiga að lesa kaflann vandlega yfir og hlusta á upplestur á dönsku sem fylgir kaflanum. Neðst á síðunni eru spurningar sem nemendur eiga að svara eftir að hafa lesið kaflann vel yfir, annað hvort í ritvinnsluskjali í tölvunni eða á blaði. Að lokum eru tvær stuttar gagnvirkar æfingar. Þá höfum við útbúið x mín. kynningu á dönskuæfingunni sem gott er að skoða áður.