Hrói höttur

Sagan af Hróa hetti og köppum hans hefur lengi verið ungu fólki hugleikin, enda höfðar hún til svo margra þátta í hugum þess. Hugmyndin um útlagann sem rænir þá ríku til þess að gefa hinum fátæku; manni sem ræðst gegn ríkjandi óréttlæti og berst gegn kúgun á eigin forsendum er eitthvað sem kemur við réttlætiskennd okkar allra. Við höfum nú útbúið heildstætt námsefni íslensku í kringum söguna af Hróa hetti, þar sem við tengjum saman bókmenntir, málfræði, ritun, krossgátur, leit á vef o.fl. Textinn er unninn upp úr gömlu þýðingu Halldórs Bríems frá því skömmu eftir aldamótin 1900, en við höfum fært málfar til nútímanlegra horfs þar sem aldarhátturinn skar um of í augun og samræmt stafsetningu. Gamli blærinn sem er svo heillandi er þó til staðar enn. Verkefnin sem fylgja hverjum kafla taka mið af markmiðum Aðalnámskrar í íslensku fyrir 7. bekk.

Ferðir Münchhausens baróns
í þýðingu Þorsteins Erlingssonar.

Í dag kynnum við til sögunnar nýtt samþætt námsefni í íslensku sem hugsað er fyrir 3.-6. bekk. Byggir það í grunninn á hinum stórskemmtilegu sögum um Münchhausen barón. Eins og alltaf er efnið bæði fáanlegt í vefútgáfu með gagnvirkum æfingum (þar sem hægt er að hlusta á kaflana upplesna) og til útprentunar með fjölbreyttum verkefnum og svörum. Verkefnin taka til flestra þeirra þátta sem kveðið er á um í Aðalnámskrá grunnskóla fyrir áðurnefnda aldurshópa. Er hér á ferðinni frábær viðbót í almenna íslenskukennslu á miðstigi sem enginn má láta framhjá sér fara.

Ævintýraheimur H.C. Andersen

Eins og margir vita eru nú [árið 2005] tvö hundruð ár liðin frá því að danska sagnaskáldið og ævintýrahöfundurinn Hans Christian Andersen fæddist, en hann fæddist nánar tiltekið þann 2. apríl árið 1805 í Óðinsvéum. Við á Skólavefnum munum að sjálfsögðu heiðra þennan danska skáldrisa hér á síðum okkar og ætlum að birta fjölmörg ævintýri eftir hann í skemmtilegum búningi, þar sem bæði er hægt að lesa sögurnar myndskreyttar og hlusta á þær í leiðinni. Að sjálfsögðu munum við bjóða sögurnar í sérstakri útprentanlegri útgáfu með alls kyns verkefnum fyrir kennara og nemendur. Fyrsta sagan sem við bjóðum upp á er hin klassíska saga - Tindátinn staðfasti. Eru sögurnar byggðar á stórkostlegum þýðingum Steingríms Thorsteinssonar, en færðar í nútímalegri búning á stöku stað. Verkefnin eru unnin með hliðsjón af aðalnámskrá grunnskóla fyrir 5. bekk í íslensku.

För Gúllívers til Putalands eftir J. Swift - Heildstætt íslenskunámsefni (5. - 6. b)

Sagan af honum Gúllíver í Putalandi eftir Jonathan Swift hefur lengi heillað unga sem aldna frá því hún kom fyrst út árið 1726. Hér er hún í þýðingu Þorsteins Erlingssonar með góðum verkefnum í íslensku sem taka mið af markmiðum Aðalnámskrár grunnskóla fyrir 6. bekk. Er hér um að ræða heildstætt námsefni í íslensku í svipuðum anda og sögurnar um Róbinson Krúsó og Tumi þumal. Sagan telur 13 kafla og skiptist í vefútgáfu og útprentanlega útgáfu. Á vefútgáfunni er hægt að hlusta á efnið upplesið.

Róbinson Krúsó eftir Daniel Defoe - heildstætt íslenskunámsefni
Sagan Róbinson Krúsó kom fyrst út árið 1719 og hét þá ,,Life and strange surprising adventures of Robinson Crusoe". Hún varð strax mjög vinsæl og enn þann dag í dag yljar hún lesendum út um allan heim, enda sagan verið þýdd á ótal tungumál. Höfundur sögunnar Daniel Defoe fæddist árið 1660 á Englandi og starfaði fyrst og fremst sem rithöfundur og blaðamaður. Hann samdi ótal skáldverk, en frægust þeirra eru sagan af Róbinson Krúsó og sagan Moll Flanders sem kom út árið 1722. Talið er að Defoe hafi haft mikil áhrif á þróun ensku skáldsögunnar og margir telja hann fyrsta eiginlega skáldsagnahöfundinn.

Hér er á ferðinni fyrsta tilraun okkar til heildstæðs námsefnis í íslensku, sem unnið er í einu og öllu samkvæmt aðalnámskrá grunnskóla. Miðast þetta námsefni fyrst og fremst við 6. bekk, en má hæglega nota í 5. og 7. bekk ef því er að skipta. Í beinni kennslu tekur námsefnið um tvo hálfan mánuð í kennslu, en einnig er hægt að taka það í minni einingum og láta það ná yfir lengri tíma. Hefur þetta námsefni hlotið mjög góðar viðtökur víða um land og er notað í mörgum skólum.

Þrautir Heraklesar - heildstætt íslenskunámsefni
Sagan af Heraklesi eða Herkúlesi, eins og hann er gjarnan nefndur, á sér rætur í grísku goðafræðinni og hefur sagan verið numin af börnum frá aldaöðli. Við bjóðum nú hér upp á söguna í skemmtilegum búningi sem allir ættu að hafa gaman af. Eins og með söguna af Róbinson Krúsó er hér um heildstætt námsefni í íslensku að ræða sem tekur mið af Aðalnámskrá grunnskóla, íslenskuþættinum fyrir 4. bekk. Þrautirnar sem Herakles þurfti að gríma við voru 12 að tölu, en alls telur sagan 14 kafla. Fyrsti kaflinn fjallar um æsku Heraklesar, en sá síðasti um endalok hans. Námsefnið hentar eins og áður segir vel í 4. bekk, en getur hæglega gengið líka í 5. og jafnvel 6. bekk. Ef námsefnið er tekið heildstætt verður það tveggja mánaða námsefni, en svo er líka hægt að taka það einu sinni í viku og þá endist það í tæpa 4 mánuði.

Drengurinn sem alltaf sagði satt

Þessi saga býr yfir ákveðinum boðskap; boðskap sem alltaf á jafn vel við og kannski ekki síst í dag þegar heiðarleiki er nánast eingöngu metinn útfrá þurrum lagabókstaf. Það, hvað má gera og hvað ekki, er orðið tilefni til deilna og hugtök eins og heiðarleiki hafa orðið svo óljósa merkingu að engin leið er að festa hönd á það. Eins og alltaf getið þið prentað söguna út með góðum verkefnum og/eða skoðað í vefútgáfu (jafnvel með skjávarpa) og hlustað á hana upplesna. Hentar vel fyrir eina kennslustund.

Að löngum árum liðnum
eftir Agnes M. Dunne

Þessi skemmtilega saga fjallar um ungan mann af aðalsættum sem fær aðstoð frá fátækum hestasveini og launar honum ríkulega. Hann órar ekki fyrir því að hann muni nokkurn tímann hitta unga hestasveininn aftur, en enginn veit sína ævi fyrr en öll er. Sagan er sniðin að íslenskukennslu fyrir 5.-7. bekk og að venju er hægt að nálgast hana í útprentanlegri útgáfu eða á vefsíðu í fjórum hlutum ásamt gagnvirkum æfingum.

Lestrarbók Skólavefsins

Nú hefur göngu sína nýr liður sem margir eiga eflaust eftir að taka fagnandi. Nefnist hann Lestrarbók Skólavefsins en þar munum við bjóða upp á stigskipta lestexta um allt milli himins og jarðar.

Þjóðsögur úr ýmsum áttum
Eins og kveðið er um í Aðalnámskrá grunnskóla er ætlast til að börn fái nokkra þekkingu á þjóðsögum og kynnist þeim fjölbreytta heimi sem þær birta okkur. Við bjóðum reglulega upp á valdar þjóðsögur úr ýmsum áttum í fjölbreyttum útgáfum, bæði til útprentunar og á vefsíðuformi. Eru vefsíðuútgáfurnar með ýmsu móti, eins og sjá má af sögunum um Sæmund fróða annars vegar og t.a.m. sögunni ,,Dreki úr arnareggi" hér fyrir neðan.

Íslensk ævintýri

Við bjóðum hér upp á gömul og sígild íslensk ævintýri sem öllum börnum og fullorðnum líka ef út í það er farið er gott að kunna skil á. Ævintýrin eru öll sett upp á vefsíðu og einnig í útprentanlegri útgáfu, aðgengileg frá forsíðunni (sjá tengil hér fyrir neðan).