Sögur herlæknisins
eftir Zacharias Topelius
í þýðingu Matthíasar Jochumssonar

Sögurnar eru eitt af stóru verkum heimsbókmenntanna. Þar er í annan stað sögð saga Svía og Finna um tveggja alda skeið, eða frá því Gústaf Adolf komst til valda fram á veldistíð Gústafs þriðja. Svo vitnað sé í orð þýðandans Matthíasar, þá mynda þær „samanofinn sagnabálk með einni og sömu umgjörð og eins og með einum og sama rauða þræði í miðri uppistöðu vefsins. ...Fyrsta bindið hefir fyrirsögnina: „Gústaf Adólf og þrjátíuára-stríðið“; en 1. kafli þeirrar sögu heitir „Hringurinn konungsnautur“. Þessi hringur er rauði þráðurinn í vefnum. Höfundur hefir þar samanofið með miklu hugviti örlaga- og gjörningatrú Finna við eðlileg rök atburðanna - ofið saman inngrónar hjátrúarhugmyndir þjóðarinnar og tímans, og hina sönnu sögu verulegs lífs, svo að álög og örlagadómar sýnast samanfalla við sjálfræðisrök og réttar tilgerðir, svo varla má í milli sjá, hvað náttúrlegt sé, og hvað töfrum að kenna. En þótt fáfróðum lesanda finnist hringurinn örlagaríkur og æði magnaður, mun honum oftast að lokum skiljast, að það, sem ræður úrslitum og auðnukjörum manna, eru engin galdraöfl utan frá, heldur eðlileg „rás viðburðanna“, orð manna, eðlisfar og athafnir.

Íslensk ævintýri

Hér eru gömul og sígild íslensk ævintýri sem fólki á öllum aldri er gott að kunna skil á. Hægt er að lesa þau á vef, hlusta á þau upplesin og prenta út með góðum verkefnum.

Kærleiksheimilið
eftir Gest Pálsson

Segja má að sagan Kærleiksheimilið eftir Gest Pálsson sé ein fyrsta saga sem skrifuð er í raunsæisstíl af íslenskum rithöfundi. Gestur Pálsson var einn af Verðandi-mönnum en þeir boðuðu raunsæið með tímariti sínu fyrstir allra á Íslandi. Sögur Gests hafa löngum þótt bera af öðrum samtímasögum og er Kærleiksheimilið af mörgum talin vera hans besta saga. Hægt er að nálgast góð verkefni með sögunni og hún er vel fallin til kennslu, bæði vegna sérstöðu sinnar, þ.e. bókmenntalegrar stöðu, og vegna þess hve skemmtileg og vel skrifuð hún er.

Ást og auður
eftir Jóhann Gunnar Sigurðsson

Þetta er stutt örlagasaga í 11 köflum, oft átakanleg. Segir þar frá stúlkunni Sigríði, bóndanum Gísla sem ann henni hugástum og kaupmanninum Þórarni sem giftist henni. Það sem kannski helst gerir söguna jafn góða og skemmtilega aflestrar og raun ber vitni er einlægnin og ákefðin sem býr að baki. Sagan getur hentað ólíkum aldurshópum og fer þá eftir hverjum einum hvernig unnið er úr verkefnunum og með söguna almennt.

Brennu-Njáls saga

Brennu-Njáls saga, eða Njála eins og hún er oft kölluð, er lengst og þekktust allra Íslendingasagna og segir sögu margra þeirra persóna sem vitnað er í í daglegu tali, ógleymanlegra persóna eins og Njáls hins vitra á Bergþórshvoli, Gunnars Hámundarsonar á Hlíðarenda, Hallgerðar langbrókar, Marðar Valgarðssonar, Skarphéðins Njálssonar, Höskuldar Hvítanesgoða og margra fleiri.

Sagan telur 159 kafla og er fáanleg bæði í vefútgáfu með upplestri og gagnvirkum verkefnum og til útprentunar í fimm heftum.

Egils saga Skallagrímssonar

Egils saga Skallagrímssonar er og verður okkur Íslendingum ávallt hugleikin, enda ein af stórbrotnustu Íslendingasögunum og talin skrifuð af sjálfum Snorra Sturlusyni. Egils sögu má skipta í tvo hluta, en sá fyrri (1-27) segir sögu Kveld-Úlfs Bjálfasonar; sona hans Skalla-Gríms og Þórólfs og baráttu þeirra við norska konungsvaldið. Sá síðari segir svo sögu Egils sjálfs, af skáldinu, vígamanninum og bóndanum sem býður erlendu valdi byrginn og hefur sigur að lokum.

Sæfarinn
eftir Jules Verne

Hér er á ferðinni námsefni í íslensku hugsað fyrir 8.-10. bekk. Sagan Sæfarinn eftir Jules Verne er notuð sem útgangspunktur inn í víðáttur íslenskunnar sem og aðrar námsgreinar ef því er að skipta. Leggjum við mikla áherslu á að gera námsefnið skemmtilegt og aðlaðandi um leið og við fylgjum markmiðum aðalnámskrár eins vel og ítarlega og efnið gefur tök á. Við hvetjum alla til að kynna sér þetta efni vel, bæði kennara og nemendur, enda má nota það bæði sem almennt kennsluefni í bekk og/eða sem einstaklingsefni og hentar vel sem þjálfunarefni fyrir samræmt próf í íslensku. Sagan telur 30 kafla og að venju er bæði hægt að nálgast efnið í sérhannaðri vefútgáfu, myndskreyttri með gagnvirkum skýringum og æfingum og/eða í útprentanlegri útgáfu með góðum verkefnum.

Í sögunni lætur Verne hetjur sínar ferðast í kafbáti um óravegu undirdjúpanna. Hafði slíkt aldrei verið gert og menn þekktu lítið til lífsins undir yfirborði sjávar. Sagan hefur haft víðtæk áhrif, ekki síst fyrir persónusköpun, en Númi (Nemo) skipstjóri hefur t.a.m. verið fyrirmynd margra síðari tíma hetja og þá hafa raunverulegir kafbátar borið nafn þessa fyrirrennara síns, Nautilius.

Hrói höttur

Sagan af Hróa hetti og köppum hans hefur lengi verið ungu fólki hugleikin, enda höfðar hún til svo margra þátta í hugum þess. Hugmyndin um útlagann sem rænir þá ríku til þess að gefa hinum fátæku; manni sem ræðst gegn ríkjandi óréttlæti og berst gegn kúgun á eigin forsendum er eitthvað sem kemur við réttlætiskennd okkar allra. Við höfum nú útbúið heildstætt námsefni íslensku í kringum söguna af Hróa hetti, þar sem við tengjum saman bókmenntir, málfræði, ritun, krossgátur, leit á vef o.fl. Textinn er unninn upp úr gömlu þýðingu Halldórs Bríems frá því skömmu eftir aldamótin 1900, en við höfum fært málfar til nútímanlegra horfs þar sem aldarhátturinn skar um of í augun og samræmt stafsetningu. Gamli blærinn sem er svo heillandi er þó til staðar enn. Verkefnin sem fylgja hverjum kafla taka mið af markmiðum Aðalnámskrar í íslensku fyrir 7. bekk.

Haraldar saga hárfagra

Einn er sá konungur í Noregi sem mest áhrif hafði á byggð landsins í upphafi sögu okkar, en það er Haraldur hinn hárfagri. Það var á hans dögum sem landið byggðist og á margan hátt fyrir hans tilverknað. Þegar hann hófst handa við að sameina Noreg undir einn konung voru margir sem vildu ekki sætta sig við það og ákváðu í kjölfarið að leita annað og fundu þá Ísland. Má segja að til að skilja sögu okkar Íslendinga sem best er nauðsynlegt að kunna skil á sögu hans. Því förum við nú af stað með sögu Haralds hárfagra eins og Snorri Sturluson hefur skráð hana í Heimskringlu.

Það fer vel á því að kenna Haralds sögu hárfagra í 5.-6. bekk samhliða umfjöllun um landnám Íslands og næstu ár þar á eftir. Það bæði hjálpar til að setja landnámið í sögulegt samhengi og skýrir margt í landnáminu og hvernig það þróaðist hér á landi. Þá ætti sagan að gefa nemendum betri hugmynd um almenn viðhorf þessa tíma og tengja þá betur inn í heim Íslendingasagna, enda gerast þær margar hverjar að stórum hluta í Noregi.

Söguna er hægt að nálgast í sérstakri útprentanlegri útgáfu með góðum verkefnum og svörum við þeim og einnig í vefútgáfu með gagnvirkum skýringum þar sem hægt er að hlusta á hana upplesna.

Kjalnesinga saga

Kjalnesingasaga fellur í flokk yngri Íslendingasagna og er talin rituð um eða eftir aldamótin 1300. Þar er raunsæið farið að víkja fyrir reyfarakenndum atburðum sem eiga ekkert skylt við raunverulega atburði. Við merkjum þar skyldleika við þjóðsögur og fornaldar- og riddarasögur. Ólíkt mörgum eldri Íslendingasögum virðist höfundur leggja meiri áherslu á að skemmta lesandanum en teygja einhvern sannleika til eða frá. Og það tekst höfundi Kjalnesinga sögu mjög vel, því sagan er skemmtileg aflestrar auk þess sem hún er vel upp byggð á allan hátt og gefur öðrum sögum ekkert eftir að því leytinu til.

Að venju er bæði hægt að nálgast kaflana í vefútgáfu með orðskýringum þar sem einnig er hægt að hluta á hana upplesna, svo og í útprentanlegri útgáfu með skýringum og góðum verkefnum. Einnig bjóðum við upp á hefti með öllum köflum, hefti með kaflalýsingum (útdráttum), verkefnahefti og svarhefti.

Júdas
eftir Sigurð Róbertsson.

Okkur er ánægja að kynna söguna „Júdas“ eftir Sigurð Róbertsson rithöfund. Sagan kom út í smásagnasafninu Utan við alfaraleið sem gefið var út árið 1942. Hér segir frá hinum eina sanna Júdasi Ískaríot, en sjónarhornið er ólíkt því sem við erum vön að fylgja og er óhætt að segja að sagan veiti okkur nýja sýn inn í þessa þekktu sögu úr Biblíunni. Já, það getur verið forvitnilegt að skoða söguna stundum í nýju ljósi.

Sagan er í 9 köflum og er eins og alltaf fáanleg bæði í sérhannaðri vefútgáfu og í útprentanlegri útgáfu með góðum verkefnum. Telur hún í útprentun 25 blaðsíður. Á vefsíðunni er hægt að hlusta á söguna upplesna. Verkefni miðast við 8.-10. bekk.

Ferðir Münchhausens baróns
í þýðingu Þorsteins Erlingssonar.

Í dag kynnum við til sögunnar nýtt samþætt námsefni í íslensku sem hugsað er fyrir 3.-6. bekk. Byggir það í grunninn á hinum stórskemmtilegu sögum um Münchhausen barón. Eins og alltaf er efnið bæði fáanlegt í vefútgáfu með gagnvirkum æfingum (þar sem hægt er að hlusta á kaflana upplesna) og til útprentunar með fjölbreyttum verkefnum og svörum. Verkefnin taka til flestra þeirra þátta sem kveðið er á um í Aðalnámskrá grunnskóla fyrir áðurnefnda aldurshópa. Er hér á ferðinni frábær viðbót í almenna íslenskukennslu á miðstigi sem enginn má láta framhjá sér fara.

Fóstbræðra saga

Fóstbræðrasaga var lengi vel talin með elstu Íslendingasögum, en nú er almennt talið að hún sé með þeim yngri og skrifuð undir lok 13. aldar. Er sagan til í mörgum uppskrifum, m.a. í Hauksbók, Möðruvallabók og Flateyjarbók, þar sem henni er skeytt inn í Ólafs sögu helga.

Sagan fjallar einkum um þá fóstbræður Þormóð Bersason, sem kallaður var Kolbrúnarskáld og Þorgeir Hávarsson. Þó að þeir bindist vinarböndum og eigi samleið í uppivöðslusemi þegar þeir eru ungir eru þeir ólíkir um flesta hluti. Þorgeir er fyrst og fremst vígamaður sem virðist ættaður aftan úr heiðni; hugmyndaheimur hans á margan hátt úr takt við samtímamenn hans, en Þormóður er fjölbreyttari maður, kvennamaður og skáld sem getur lagað sig að breyttum aðstæðum, s.s. tileinkað sér nýja trú o.þ.h.

Er sagan ólík öðrum Íslendingasögum, ekki síst fyrir afstöðu höfundar. Í flestum Íslendingasögum er höfundurinn nánast ósýnilegur í bakgrunni og lætur söguþráðinn líða áfram án þess að taka beina afstöðu, en því er hins vegar öðruvísi farið í Fóstbræðrasögu. Þar talar höfundurinn til okkar nánast með beinum hætti. Hefur sagan heillað marga vegna skemmtilegra lýsinga og sérstæðs stíls og t.a.m. byggði Halldór Kiljan Laxness sögu sína „Gerplu“ á Fóstbræðrasögu.

Haralds saga harðráða

Haralds saga Sigurðssonar hins harðráða hefur löngum verið Íslendingum kær og kannski ekki síst fyrir þær sakir að Haraldur tengist Íslendingum sterkari böndum en flestir aðrir konungar Norðmanna frá þessum tímum og var þeim jafnan hliðhollur. Haraldur konungur ríkti til ársins 1066, þá rétt rúmlega fimmtugur, og hafði á ótrúlega stuttri ævi afrekað ótrúlega mikið.

Eins og með aðrar konungasögur frá þessum tíma byggir Snorri frásögn sína oft á hæpnum heimildum og er enda kannski meira í mun að segja áhugaverða sögu en að sagnfræðin sé alltaf kórrétt höfð að leiðarljósi. Því ber að taka sögunni með varúð hvað það varðar, en þó er sagan í stórum dráttum skilmerkileg. En til að fá sem gleggsta mynd af Haraldi þeim er Snorri dregur upp svo skemmtilega mynd af er best að lesa söguna af eigin raun og síðan geta menn lesið álit og umsagnir fræðimanna, og eru þá betur í stakk búnir að meðtaka þeirra boðskap. Telur sagan 101 kafla.

För Gúllívers til Putalands eftir J. Swift - Heildstætt íslenskunámsefni (5.-6. b.)

Sagan af honum Gúllíverí Putalandi eftir Jonathan Swift hefur lengi heillað unga sem aldna frá því hún kom fyrst út árið 1726. Hér er hún í þýðingu Þorsteins Erlingssonar með góðum verkefnum í íslensku sem taka mið af markmiðum Aðalnámskrár grunnskóla fyrir 6. bekk. Er hér um að ræða heildstætt námsefni í íslensku í svipuðum anda og sögurnar um Róbinson Krúsó og Tumi þumal. Sagan telur 13 kafla og skiptist í vefútgáfu og útprentanlega útgáfu. Á vefútgáfunni er hægt að hlusta á efnið upplesið.

Tumi þumall

Við leggjum nú af stað með þriðju framhaldssöguna okkar, sem jafnframt er heildstætt námsefni í íslensku fyrir 4. bekk. Er þetta hin sígilda saga af Tuma þumli í þýðingu Þorsteins Erlingssonar, en ritháttur á stöku stað færður til nútímans. Er hér um metnaðarfullt námsefni að ræða, sem unnið er í beinum tengslum við íslenskuþáttinn í Aðalnámskrá grunnskóla fyrir 4. bekk. Reynt hefur verið að draga alla meginþætti námskrárinnar inn í efnið og því tekur það á þáttum eins og lestri, málfræði, ritun, málnotkun o.fl. Framhaldssagan er boðin bæði í útprentanlegu formi með fjölda verkefna og á vefsíðuformi með gagnvirkum æfingum. Áður hafa komið út tvær framhaldssögur á Skólavefnum, Róbinson Krúsó og Sagan af þrautum Heraklesar, sem báðar nutu mikilla vinsælda og gefur þessi nýja saga hinum fyrri ekkert eftir. Hér gefst kennurum tækifæri til að nota framsækið kennsluefni sem jafnframt sameinar hefðbundna framsetningu námsefnis og það nýjasta sem upplýsingatæknin býður upp á.

Róbinson Krúsó eftir Daniel Defoe - heildstætt íslenskunámsefni

Sagan Róbinson Krúsó kom fyrst út árið 1719 og hét þá ,,Life and strange surprising adventures of Robinson Crusoe". Hún varð strax mjög vinsæl og enn þann dag í dag yljar hún lesendum út um allan heim, enda sagan verið þýdd á ótal tungumál. Höfundur sögunnar Daniel Defoe fæddist árið 1660 á Englandi og starfaði fyrst og fremst sem rithöfundur og blaðamaður. Hann samdi ótal skáldverk, en frægust þeirra eru sagan af Róbinson Krúsó og sagan Moll Flanders sem kom út árið 1722. Talið er að Defoe hafi haft mikil áhrif á þróun ensku skáldsögunnar og margir telja hann fyrsta eiginlega skáldsagnahöfundinn.

Hér er á ferðinni fyrsta tilraun okkar til heildstæðs námsefnis í íslensku, sem unnið er í einu og öllu samkvæmt aðalnámskrá grunnskóla. Miðast þetta námsefni fyrst og fremst við 6. bekk, en má hæglega nota í 5. og 7. bekk ef því er að skipta. Í beinni kennslu tekur námsefnið um tvo hálfan mánuð í kennslu, en einnig er hægt að taka það í minni einingum og láta það ná yfir lengri tíma. Hefur þetta námsefni hlotið mjög góðar viðtökur víða um land og er notað í mörgum skólum.

Þrautir Heraklesar - heildstætt íslenskunámsefni

Sagan af Heraklesi eða Herkúlesi, einsog hann er gjarnan nefndur, á sér rætur í grísku goðafræðinni og hefur sagan verið numin af börnum frá aldaöðli. Við bjóðum nú hér upp á söguna í skemmtilegum búningi sem allir ættu að hafa gaman af. Eins og með söguna af Róbinson Krúsó er hér um heildstætt námsefni í íslensku að ræða sem tekur mið af Aðalnámskrá grunnskóla, íslenskuþættinum fyrir 4. bekk. Þrautirnar sem Herakles þurfti að gríma við voru 12 að tölu, en alls telur sagan 14 kafla. Fyrsti kaflinn fjallar um æsku Heraklesar, en sá síðasti um endalok hans. Námsefnið hentar eins og áður segir vel í 4. bekk, en getur hæglega gengið líka í 5. og jafnvel 6. bekk. Ef námsefnið er tekið heildstætt verður það tveggja mánaða námsefni, en svo er líka hægt að taka það einu sinni í viku og þá endist það í tæpa 4 mánuði.

Jón halti eftir Jónas Jónasson frá Hrafnagili

Eflaust kannast margir við Jónas Jónasson frá Hrafnagili, þann er tók saman bókina ,,Íslenskir þjóðhættir", sem skólanemar og aðrir hafa stuðst svo vel við í gegnum tíðina. En þeir eru kannski færri sem vita það að Jónas var afkastamikill skáldsagnahöfundur og einn fyrsti spennusagnahöfundur okkar Íslendinga ef Íslendingasögurnar sjálfar eru ekki taldar með. Við ætlum nú að kynna ykkur þessa hlið á manninum Jónasi Jónassyni frá Hrafnagili með því að bjóða ykkur upp á söguna ,,Jón halti" eftir hann í framhaldssöguformi.
Verkefnin sem fylgja sögunni eru unnin miðað við Aðalnámskrá grunnskóla, en auk þess er reynt að skoða söguna út frá bókmenntalegum forsendum og nokkur helstu hugtök sem notuð eru við slíkar greiningar kynnt og unnið með þau.
Sagan er myndskreytt af Irene Ósk Bermudez.

Benjamín Franklín - Ævisaga þýdd af Jóni Sigurðssyni

Þessi framhaldssaga segir frá einni af frelsishetjum Bandaríkjanna, Benjamín Franklín. Sagan er samin af dönskum presti, sem ekki er nafngreindur, og þýdd af okkar helstu frelsishetju, sjálfum Jóni Sigurðssyni forseta. Hún kom fyrst út árið 1839 og var gefin út af Hinu íslenska þjóðvinafélagi. Eins og gefur að skilja höfum við orðið að gera ofurlitlar breytingar á stafsetningu hennar, en leyfum orðalagi Jóns að öðru leyti að njóta sín.

Við viljum loks vekja athygli ykkar á nýrri framsetningu textans á vefútgáfunni, sem býður upp á mikla möguleika. Nú getið þið t.a.m. breytt leturstærð og lit bakgrunns á mjög einfaldan hátt.

Ævintýraheimur H.C. Andersen

Eins og margir vita eru nú [árið 2005] tvö hundruð ár liðin frá því að danska sagnaskáldið og ævintýrahöfundurinn Hans Christian Andersen fæddist, en hann fæddist nánar tiltekið þann 2. apríl árið 1805 í Óðinsvéum. Við á Skólavefnum munum að sjálfsögðu heiðra þennan danska skáldrisa hér á síðum okkar og ætlum að birta fjölmörg ævintýri eftir hann í skemmtilegum búningi, þar sem bæði er hægt að lesa sögurnar myndskreyttar og hlusta á þær í leiðinni. Að sjálfsögðu munum við bjóða sögurnar í sérstakri útprentanlegri útgáfu með alls kyns verkefnum fyrir kennara og nemendur. Fyrsta sagan sem við bjóðum upp á er hin klassíska saga - Tindátinn staðfasti. Eru sögurnar byggðar á stórkostlegum þýðingum Steingríms Thorsteinssonar, en færðar í nútímalegri búning á stöku stað. Verkefnin eru unnin með hliðsjón af aðalnámskrá grunnskóla fyrir 5. bekk í íslensku.

Ævintýri Þorsteins Erlingssonar

Þetta eru hin sígildu ævintýri úr bókinni „Málleysingjar“ eftir Þorstein Erlingsson. Enn sem komið er eru þau bara fáanleg til útprentunar, skemmtilega myndskreytt með góðum verkefnum og svörum, en innan skamms verða þau einnig fáanleg á vefsíðu. Þið finnið fleiri ævintýri eftir Þorstein Erlingsson í höfundaskrá og undir 5.-7. bekk.

Hrafnkels saga Freysgoða

Við viljum vekja athygli ykkar á skemmtilegri og áhugaverðri nýjung sem við bjóðum upp á, en það er sagan um Hrafnkel Freysgoða í framhaldssögugerð með kortum, skýringum og alls kyns fróðleik. Eins og alltaf er bæði hægt að njóta sögunnar beint af vefnum og/eða prenta hvern kafla út með verkefnum og svörum við þeim. Þessi skemmtilega saga ætti að vekja áhuga allra sem unna góðum sögum og þá er hér tilvalið tækifæri til að byrja að kynna sér Íslendingasögurnar, sjálfan menningarfinn, enda munu fleiri sögur fylgja í kjölfarið. Á vefsíðunni er einnig hægt að hlusta á kaflana upplesna.

Gísla saga Súrssonar

Hér býðst hentugt tækifæri að kynna sér eina af áhugaverðustu Íslendingasögunum í aðgengilegum skömmtum.Vefsíðuútgáfunni fylgja gagnvirkar orðskýringar, gagnvirkar æfingar, ýmis fróðleikur og einnig er hægt að hlusta á hana upplesna. Útprentanlegu útgáfunni fylgja góðar spurningar, orðskýringar og verkefni. Æfingar og verkefni miðast við 8.-10. bekk. Einnig bjóðum við upp á sérstaka vinnubók með sögunni fyrir kennara og nemendur. Sagan er myndskreytt af listamanninum Jonathan Twigger.

Gunnlaugs saga ormstungu

Næsta Íslendingasagan sem við bjóðum upp á hér á Skólavefnum er Gunnlaugs saga ormstungu, en hún er, eins flestum er kunnugt, kennd í mörgum skólum og er auk þess stórkostleg saga. Er hún sett upp á svipaðan hátt og Hrafnkels saga, með góðum verkefnum og skýringum til að auðvelda öllum að nálgast hana. Eins og ávallt er hægt að prenta hvern kafla út með fróðleiksmolum, verkefnum og svörum við þeim eða þá að njóta hennar beint af vefnum með upphleyptum orðskýringum, gagnvirkum æfingum og fróðleiksmolum. Þar er einnig hægt að hlusta á kaflana upplesna. Listamaðurinn Jonathan Twigger myndskreytti.

Egils saga einhenda og Ásmundar berserkjabana

Þessi framhaldssaga er fengin úr sagnasafninu Fornaldarsögur Norðurlanda. Hér segir frá tveimur köppum, Agli og Ásmundi, sem leggja í leiðangur til að bjarga dætrum konungs, sem rænt var af skelfilegum óvættum. Sagan er hér í nokkuð einfaldaðri útgáfu og ætluð til kennslu í 3.-5. bekk grunnskóla. Hún er prýdd glæsilegum myndum eftir listamanninn Jonathan Twigger, sem hefur meðal annars myndskreytt Hrafnkels sögu Freysgoða og Gunnlaugs sögu ormstungu.

Allir og Enginn eftir Jóhann Hjálmarsson

Hér er á ferðinni stutt framhaldssaga eftir skáldið og rithöfundinn Jóhann Hjálmarsson sem nefnist ,,Allir og Enginn". Er þetta skemmtilegt ævintýri í fimm köflum þar sem segir frá landi sem á sér engin landamæri og er í raun ekki til. Íbúar þess heita Allir og Enginn. Sagan hefur einungis einu sinni áður birst á prenti, en það var í Lesbók Morgunblaðsins árið 1965. Var hún þá myndskreytt af listamanninum Alfreð Flóka og fylgja þær myndskreytingar sögunni hér.